Bravó Elsa

Þakka þér kærlega fyrir Elsa, þú hefur séð í gegnum skrípaleikinn og komið auga á raunverulegann vanda þjóðfélagsins. Hér fyrir neðan er sundurliðun á vandamálunum.

1. Fyrst og fremst eru það klámfengnar auglýsingar sem eru að spilla bæði ungum sem öldnum. Í þessari auglýsingu má sjá bæði framhandlegg og lostafullt bros, sem vekur ókristilegar hugsanir hjá karlpeningnum og þeirra kvenna sem laðast að öðrum konum.

Lausn: Konur skulu aldrei láta sjást í bert hold fyrir ofan úlnlið og lostafull bros skulu vera gerð refsiverð (opinberar flengingar eru hugsanlega ekki rétta refsingin þar sem það gæti æst lýðinn meira en brosið gerði upphaflega).

2. Næsta atriði eins og Elsa bendir réttilega á er að hjúkrunarfræðingar eru með 4 ára háskólanám að baki en ég leyfi mér að efast um að það sé farið ítarlega yfir rúðurskipti í því námi. Því verðum við að gefa okkur það að annað hvort hafi þessi kona verið ráðin til þess að jafna kynjahlutfall fyrirtækisins (sem er gífurlega ósanngjarnt gagnvart faglærðum einstaklingum sem vinna á verkstæðinu) eða þá að hún sé að vinna svarta vinnu milli þess sem hún hjúkkast.

 3. Svo virðist sem að hjúkrunarfræðingum líki ekki vel við að þær fái á sig stimpil sem kynæsandi hjúkrunarkonur og það með rentu. Allir sem hafa komið inn á spítala sjá það undir eins að þetta er alls ekki rétt mynd af spítala starfsfólki. þessvegna hef ég tekið mér bessaleyfi til þess að breyta auglýsingunni til þess að koma til móts við hjúkrunarfræðinga.

 

 

Þannig að munið, stoppið kynbundna mismunun (í báðar áttir) og svarta vinnu hjúkrunarfræðinga.